Vilja varðveita læknaviðtaluna á Strondum

Sjóvar kommuna fekk í gjár 545 undirskriftir frá fólki á vestara armi á Skálafjørðinum. 

Tey vilja varðveita læknaviðtaluna á Strondum.

Tey heita staðiliga á kommunustýrini við Skálafjørðin um at varðveita tvær læknaviðtalur í Heilsumiðstøðini á Strondum.

Tey siga, at samstarvsavtalan millum Sjóvar kommunu, Nes kommunu og Runavíkar kommunu frá 2014 um at hýsa øllum viðtalum í læknadøminum í Heilsumiðstøðini í Runavík, hevur ikki borið á mál.

Tað eiga kommunustýrini at viðurkenna og taka til eftirtektar, siga tey.

Við verandi skipan við tveimum læknum í viðtaluhølunum á Strondum eru loksins útlit fyri, at vit kunnu fáa virðilig og støðug læknaviðurskifti, siga tey.

Borgarstjórin tók móti undirskriftunum og lovaði at bera áheitanina víðari til kommunustýrið.