Makrelprísurin framvegis góður

Tá prísurin fyri makrel fyrr hevur verið góður, hevur hann ikki verið tað leingi í senn.

Men hetta er øðrvísi nú, sigur Finn-Arne Egeness, sem ger greiningar um fiskivinnuna í norska bankanum Nordea, við Fiskeribladet.

Í Noregi er prísurin farin upp í 49 krónur fyri kilo. Tað eru 32 krónur og 65 oyru í okkara pengum.

Við árslok var miðalprísurin 38 norskar krónur, ella 25 krónur og 32 oyru.

Hann var tá 77 prósent hægri, enn hann var í 2024.

Og Finn-Arne Egeness væntar, at prísurin verður har uppi, tí makrelkvoturnar eru minkaðar nógv.