266b í Landsrættinum

Hóast revsingin var ov lítil til at farast kundu beinleiðis í Landsrættin, gav Processbevillingsnævnet loyvi til at fara í Landsrættin við málinum.

Og tað verður viðgjørt í Eystari landsrætti í dag.

Maðurin, sum er ákærdur, er ákærdur fyri at bróta grein 266b í revsilógini.

Føroya rættur gav honum tíggju dagsektir á 500 kr.

Men maðurin góðtekur ikki dómin. Hann hevur einki revsivert gjørt, sigur hann.

Hann hevur bara brúkt talufrælsið.

Maðurin er ákærdur fyri at skriva niðrandi um samkynd á Facebook.

Grein 266 b í revsilógini sigur, at tann, sum alment ella við størri útbreiðslu í hyggju setir fram útsøgn ella boðskap, sum hóttir, spottar ella eyðmýkir persónsbólk orsakað av millum annað kynsligum samleika, verður revsað ella revsaður við sekt ella fongsli í upp til tvey ár.