Samgongan er opin fyri at stytta arbeiðsvikuna

Nýggja landsstýrissamgongan er opin fyri møguleikanum at stytta arbeiðsvikuna.

Tað stendur í samgonguskjalinum, sum var kunngjørt fyrrapartin.

Sagt verður: Í samráðingum við fakfeløg eiga vit at verða opin fyri møguleikanum at stytta arbeiðsvikuna.

Samgonguflokkarnir siga, at hon ætlar at skipa og styrkja samstarvið millum arbeiðsgevarar, fakfeløg og myndugleikar í sonevndum trípartasamstarvi.

Miða eftir at samráðast í krónum

Til tess at tryggja, at lønargjógvin ikki veksur, skal miðast eftir at samráðast í krónum heldur enn í prosentum, verður sagt.

Samgongan sigur seg vilja virka fyri, at fleiri velja størv í umsorganar- og røktarøkinum, og almenni arbeiðsmarknaðurin eigur at verða smidligur. Fólk skulu í størri mun hava møguleika at fara upp ella niður í arbeiðstíð.

Eisini sigur samgongan seg vilja lata skattafrádrátt ella endurgjald við hámarki fyri limaskap í fakfelagi. 

Meira úr Barsilsskipanini og barnakekkur

Barsilsskipanin skal vera smidligari, so foreldur sjálvi kunnu leggja til rættis, sigur samgongan.

Hámarkið í barsilsskipanini eigur støðugt at hækka upp í 60.000 kr., og foreldur eiga ikki at fara niður í løn, tá ið tey fara í barnsburðarfarloyvi.

Samgongan sigur seg eisini vilja lata skattafrían barnakekk upp á 20.000 kr. úr Barsilsskipanini, tá ið barn kemur í verðina.