Onnur enn SEV sleppa at selja streym til privat húski

Nú verður farið undir eina tilgongd at lata onnur enn SEV selja streym til privat húski.

"Vit skulu skunda undir at loyva fleiri inn á marknaðin, sum framleiða inn á netið hjá SEV."

Tað stendur millum annað í samgonguskjalinum hjá nýggju ABC-samgonguni. 

Í undanfarnu samgongu legði Ingilín D. Strøm uppskot um elveitingarlóg fyri tingið, tá hon sat sum landsstýriskvinna í umhvørhvørvismálum. Uppskotið loyvdi einum privatum søliuiði, ið tó skuldi ganga gjøgnum SEV.

Tað vil siga, at privat kundu, eftir at hava vunnið eitt útboð, framleiða streym á netið hjá SEV, og selja tað, men fyrst máttu tey keypa tað aftur frá SEV.

Síðani kundu tey selja tað víðari í eini heildarloysn, til dømis við eini hitapumpuskipan. 

Javnaðarflokkurin landsfund, Ingilín D. Strøm

Tikið úr uppskotinum 

Hetta var tó tikið úr aftur lógaruppskotinum. Síðani var málið atkvøtt úr nevnd og samtykt uttan ásetingina um sølulið. 

Hinvegin var ein áseting í lógini um at binda fyri, soleiðis at bara SEV kann eiga netið og hava virksemi við elneti. 

Ein áseting, sum til dømis forðar fyri, at stóru fyritøkurnar fara at framleiða sín egna streym og kopla seg av samhaldsfasta netinum.

Lógin legði fót fyri Eysturlund, sum var ein ætlað vindmyllulund í Lambahaganum í Eysturoynni, ið Effo og Bakkafrost standa fyri, og sum skal framleiða streym, ið so skal flytast til Fuglafjarðar.

Verkætlanin varð steðgað við elveitingarlógini, men hetta ætlar nýggja samgongan eisini at broyta. 

í samgonguskjalinum stendir millum annað, at 

"Møguleiki skal vera hjá privatum at leggja net saman við SEV. Hetta eftir langtíðaravtalu millum partarnar, har SEV eigur netið."

Spurningurin er, um elveitingarlógin má rullast aftur, skal hetta gerast.