ES lænir Ukraina 673 milliardir krónur

ES-londini hava fyribils góðkent risastóra lánið uppá 90 milliardir evrur, slakar 673 milliardir krónur, til Ukraina. Og samstundis hevur ES samtykt tann 20. pakkan við tiltøkum ímóti Russlandi. Tað hendir eftir, at Ungarn valdi ikki at brúka sýtingarrættin.

Tað upplýsir eitt talsfólk fyri kýpriotisku myndugleikarnar fyri Reuters-tíðindastovuni, og sagt verður eisini, at tey 27 limalondini væntandi skriva undir lánsavtaluna seinnapartin í morgin.

Orbán skrivaði ikki undir

ES samtykti í fjør at veita Ukraina fíggjarligan stuðul í 2026 og 2027, men táverandi ungarski forsætisráðharrin, Viktor Orbán, sýtti at skriva undir avtaluna samstundis sum hann legði Ukraina undir at forða fyru flutningi av russiskari olju gjøgnum rørleiðingar, sum vóru oyðilagdar av russiskum álopum.

Innanhýsis ósemjan í ES hevur eisini forðað fyri tiltøkum móti Russlandi. ES ætlaði at seta tiltøk í verk á fýra ára degnum fyri russiska álopinum á Ukraina, men tað var av ongum enn einaferð, tí Ungarn ikki tók undir við hinum ES-londunum.

Men ungarska støðan er broytt, tí Viktor Orbán er ikki longur forsætisráðharri, og Peter Magyar, sum vann valið í Ungarn, er meira ES-vinaligur enn undanmaðurin.