Vápnahvíldin longd í óásetta tíð

Amerikanski forsetin, Donald Trump, sigur, at hann ætlar at leingja vápnahvíldina við Iran í óásetta tíð, fyri at gera tað møguligt at fáa glið á friðarsamráðingarnar.

Hetta, hóast tað tíðliga í morgun ikki var greitt, um Iran og Ísrael vildu góðtaka hetta.

Tað skrivar Reuters-tíðindastovan í morgun.

Í einari fráboðan á sosialum miðlum, segði amerikanski forsetin, at USA hevði góðtikið eina umbøn frá pakistanskum semingsmonnum, um at "útseta amerikonsku álopini á Iran, til leiðararnir og umboð kunnu leggja fram eitt samlað uppskot um frið - og kjakið upp á ein ella annan máta er liðugt."

Pakistanskir leiðarar hava staðið fyri samráðingunum fyri at fáa ein enda á krígnum, sum hevur dripið í túsundtals fólk,  og sum hevur skeiklað heimsbúskapin.

Stongsilin heldur fram

Men tá hann boðaði frá, at hann einsamallur hevði gjørt av at leingja vápnahvíldaravtaluna, segði Donald Trump, at amerikanski flotin fer at halda fast við stongsilin av iranskum havnum. Og tað kann gerast ein avbjóðing í samráðingunum, tí júst tað tekur iranska leiðslan sum eina krígsatgerð, skrivar Reuters-tíðindastovan.

Iranskir myndugleikar hava ikki enn sagt nakað alment um fráboðanina hjá Donald Trump. Onkur tekin vóru tó um, at móttøkan í Iran var meira so sum so.

Tasnim-tíðindastovan, sum er knýtt at islamiska uppreistrarherinum, segði, at Iran hevði ikki biðið um, at vápnahvíldin skuldi leingjast. Hann hevur eisini hótt við at bróta amerikanska havnastongsilin við hermegi.

Og leiðarin fyri iransku samráðingarnevndini, Mohammand Baqer Qalibaf, segði, at fráoðanin frá Trump hevði lítið uppá seg, og kundi hetta kundi vera ein roynd frá amerikanska forsetanum at snýta iranar.