Løgmanssteypið: HB og André vunnu sannførandi

Í gjár vóru tríggjar av fýra fjórðingsfinalum í kappingini um Løgmanssteypið. HB vann 3-1 á B36, KÍ vann 3-0 á Toftum móti B68 og Víkingur vann 5-0 á FC Hoyvík í Sarpugerði. Fjórða og seinasta fjórðingsfinalan verður í kvøld millum 07 Vestur og NSÍ.

HB – B36 3-1 (2-0)

1-0 Mathias Voss, 32

2-0 Storm Pettersen, 45

3-0 Ejvind R. Mouritsen, 76

3-1 Tobias Hansen, 90+4

HB svaraði aftur

Tað var stórt trýst á HB undan grannauppgerðini móti B36 í gjár. Liðið tapti greitt fyri KÍ í landskappingini og tað er langt upp til fremstu plássini. Tí var tað av stórum týdningi fyri HB og André Olsen at vinna dystin. Hóast tað var minni munurin í spæli og málmøguleikum, vann HB ein tryggan 3-1 sigur. Mathias Voss legði HB á odda eftir 32. minuttir. Málmøguleikin var ikki ein av teimum heilt stóru, men skotið rakti í verjuspælaran hjá B36 og snýtti Silas Eyðsteinsson í málinum hjá B36.

Beint fyri hálvleik fór sami Silas Eyðsteinsson út eftir einum bólti, sum hann ikki rakk. Bólturin endaði fyri føturnar á norska áleyparanum hjá HB, Storm Bugge Pettersen. Hann gjørdi skjótt av og sendi bóltin beint í málið. 2-0. Í seinna hálvleiki royndi B36 at koma aftur í dystin, men tað bleiv ongantíð vandamikið frammanfyri málinum hjá HB. Heldur var tað HB, sum setti punktum eitt korter fyri tíð. Ejvind R. Mouritsen sendi eitt innlegg frá Dan í Soylu hegnisliga í málið.

Stór frøi í HB-húsinum og ikki minst á bonkinum hjá HB. Við sigrinum er trýstið á André Olsen minkað nógv.

andre_mynd.png

Frítekst tagging: 

Ítróttur

Fótbóltur

Meistaradeildin

HB

André Olsen

B68 – KÍ 0-3 (0-2)

0-1 Páll A. Klettskarð, 27

0-2 Árni Frederiksberg, 42

0-3 Páll A. Klettskarð, 64

Profilarnir avgjørdu

Tað vóru profilarnir, sum sendu KÍ í hálvfinaluna. Páll A. Klettskarð og Árni Frederiksberg skoraðu málini. Longu í hálvleikinum var greitt, at KÍ helst fór at verða í pottinum til lutakastið í kvøld. Magnus Powell, venjari hjá KÍ, blandaði kortini til dystin á Toftum. Mark F. Jensen, Gilli Rólantsson, Daniel Johansen, Jonn Johannesen og Hampus Näsström vóru allir nýggir frá byrjan í mun til landskappingardystin móti HB sunnudagin.

Jonn Johannesen átti lut í fyrsta málinum, sum Páll A. Klettskarð skoraði. Fyri hálvleik skoraði Árni Frederiksberg beinleiðis upp á fríspark. Páll A. Klettskarð setti punktum við góðum skoti, sum rakti yvirleggjaran og fór í mál. KÍ tykist hava fótað sær eftir javnleikin á Argjum. Fyri B68 merkir hetta, at liðið nú kann hugsavna seg um landskappingina.

Víkingur – FC Hoyvík 5-0 (1-0)

1-0 Jákup Johansen, 15

2-0 Sølvi Vatnhamar, 59 br

3-0 Jákup Johansen, 66

4-0 Mikkel Hyllegaard, 72

5-0 Mikkel Hyllegaard, 87

Víkingur vann ein lættan 5-0 sigur á FC Hoyvík. Jóhan Petur Poulsen, venjari hjá Víkingi, hevði eisini blandað kortini. Nýggir frá byrjan vóru Dávid á Líðarenda, Jens Eiler Samsson, Filip Djordjevic og Kaj Leo í Bartalsstovu. Hetta er fyrsti dysturi hjá Dávidi á Líðarenda.

Tað tók eina løtu, at fáa um báðar endarnar á dystinum. Jákup Johansen stútaði Víkingi á odda í fyrra hálvleiki, men tað er ikki fyrr enn í fyrru hálvu av seinna hálvleiki, at Víkingur tryggjar sigurin. Fyrst Sølvi Vatnhamar við einum heldur bíligum brotssparki, og síðani aftur Jákup Johansen.

Ein nýggjur maður í Sarpugerði í ár er danski Mikkel Hyllegaard. Hann hevur ikki vunnið seg fram við góðum spæli, men skjóti vongurin setti punktum við málum til 4-0 og 5-0. í seinna hálvleiki kom Fríði Gertsson Jarnskor á vøllin til sínar fyrstu minuttir á besta liðnum.

Í kvøld klokkan 18.30 verður fjórða fjórðingsfinalan. Hon er millum 07 Vestur og NSÍ. Eftir dystin verður lutakastið til hálvfinalurnar.