Nevnd vil hava avmarking

Tøl eiga at vera sett á mongdina av heilivági, sum ferðandi til Føroya kunnu hava við sær til egna  nýtslu.

Tað heldur trivnaðarnevndin hjá løgtinginum, sum heitir á landsstýriskvinnuna í heilsumálum um at áseta reglur um, hvussu stórar mongdir av heilivági, ferðandi kunnu hava við sær til egna nýtslu.

Tá fær eftirlitsmyndugleikin greiðar heimildir og leiðbeining um handfaring av heilivágnum.

Sambært lógaruppskotinum kunnu ferðandi, sum koma til Føroya, hava heilivág við sær til egna nýtslu.

Í galdandi lóg er orðið persónur.

Ferðandi

Tað skal broyast til ferðandi.

Orsøkin er, at Kærustovnurin hevur avgjørt, at heimild er at flyta inn heilivág, sum er bílagdur á netinum, til egna nýtslu.

Tað er, at heimildin ikki er avmarkað til ferðandi, sum koma til landið. 

Tað eigur hon at vera, sigur landsstýrið.

Føroyska skipanin og eftirlitið eru innrættað soleiðis, at heilivágur til egna nýtslu ikki kann bíleggjast á netinum.