Grønlendingar mótmæla USA

Boðað er frá mótmælisgongu í Nuuk í dag, nú nýggja amerikanska konsulátið letur upp.

- Vit vilja gera USA greitt, at sjálvsavgerðarrætturin og framtíðin hjá grønlendska fólkinum liggur hjá okkum, og at hesi rættindi hjá komandi ættarliðum skulu ikki vanvirðast á henda hátt, sigur Aqqalukkuluk Fontain, sum skipar fyri mótmælisgonguni.

Amerikanski sendiharrin í Keypmannahavn, Ken Howery, verður við til móttøkuna, tá nýggja konsulátið, sum er í miðbýnum í grønlendska høvuðsstaðnum, letur upp seinnapartin.

Men serligi sendimaðurin hjá Trump í Grønlandi, Jeff Landry, sum hevur verið í Nuuk síðstu dagarnar, er tó farin av landinum aftur, og verður tí ikki við.

Landsstýrisformaðurin ikki til móttøku

Grønlendski landsstýrisformaðurin, Jens-Frederik Nielsen, sigur við blaðið Sermitsiaq, at hann verður ikki við til móttøkuna á amerikanska konsulátinum.

Sambært Sermitsiaq hava fleiri onnur, sum vóru boðin til stóru móttøkuna, eisini sagt "nei takk".

Orsøkin er spenta støðan millum Grønland og USA, har amerikanski forsetin fleiri ferð hevur sagt seg vilja eiga og stýra Grønlandi.