Tørvur á felagi fyri marknaðarfólk

- Um fólk í hesi vinnuni ikki læra at brúka vitlíki til sín fyrimun, hvørva eitt nú teksthøvundar, myndafólk, grafikarar og onnur skapandi marknaðarfólk.

Soleiðis sigur Eiler Fagraklett, formaður í endurstovnaða áhugafelagnum føroysk marknaðarfólk.

Og tað er júst vitlíki, sum er ein av høvuðsorsøkunum til, at felagið føroysk marknaðarfólk er endurstovnað júst nú.

Tað er blivi lættari hjá fólki at gera sínar egnu lýsingar, og tað ávirkar lýsingatilfarið, sum vit síggja úti í almenna rúminum.

- Støðið á lýsingunum er lækkað, so hvørt vitlíki er blivið lættari atkomilig hjá vanligum fólki at brúka, sigur Henny á Líknargøtu, ein av nevndarlimunum í endurstovnaða felagnum.

Í morgunsendingini greiða Eiler Fagraklett og Henny á Líknargøtu frá ávirkanini av vitlíki á lýsingaheimin og um ætlanirnar við endurstovnaða felagnum.

Felagið føroysk marknaðarfólk virkaði frá 2013 fram til 2019, tá virksemið steðgaði. Áhugafelagið er eitt forum, har fólk í vinnugreinini kunnu savnast, kjakast, vitanardeila, netverka og vinna sær íblástur.