Eftir flogseinkingar: NSÍ og Hamrun Spartans spæla sum ætlað

Mjørki gjørdi, at mótstøðuliðið hjá NSÍ í Conference League, Hamrun Spartans av Malta, ikki fekk lent í Føroyum í gjár.

Leiguflogfarið mátti fara til Bergen, og ikki fyrrenn seint fyrrapartin í dag eydnaðist at koma niður at í Vágum.

Við tí í huga vildi Hamrun Spartans hava Uefa at flyta dystin til í annaðkvøld, skrivaðu portal.fo og bolt.fo, men hesum ynski hevur evropeiska fótbóltssamgongan ikki gingið á møti.

Tí verður fyrri dysturin í 1. umfari av kappingini spældur í kvøld klokkan 19.45 sum ætlað við Djúpumýru. Kringvarpið hevur beinleiðis útvarpsfrásøgn frá dystinum.