Kommunur eiga at samstarva um havnir

Í 2. parti í útvarpsrøðini ”Oyggjar undir trýsti” varð Birita Wardum spurd, um stóra grótbrotið á Glyvursnesi, har grót varð tikið til nýggja havnarlagið í Havn, var eitt heppið bragd. 

Hon svaraði, at grótbrot í sjálvum sær eru ikki heppin brøgd, tí tey gera stór hol í fjallasíðurnar. Spurningurin var kortini, hvussu Tórshavnar kommuna annars skuldi havt víðkað um havnarlagið, segði hon og legði aftrat: 

- Eg sakni, at ein landsplanlegging er í Føroyum fyri havnarvirksemi, og at samstarvað verður tvørtur um kommunumørk um, hvar útbyggingar skulu vera, so útbyggingar ikki verða gjørdar allastaðni, og lendið kann verða brúkt optimalt. 

Borgarstjórin fyri samstarvi 

Elsa Berg, borgarstjóri, tók í sendingini undir við býararkitektinum: 

- Eg trúgvi upp á kommunalt samstarv í sambandi við havnarvirksemi. Eg dugi væl at síggja, at tað kann vera trupult at koma fram til, hvussu samstarvið skal síggja út, men tey klára tað aðrastaðni, og vit eiga at flyta okkum tann vegin, segði Elsa Berg. 

So hvørt sum havnir verða útbygdar, hvørvur fjøra, og í staðin fyri friðsælan sjóvarmála fáar borgararnir ofta vinnuligt virksemi í grannalagnum, sum kann órógva við gangi, ljósi og osi. 

Sámal Matras Kristiansen, samfelagsfrøðingur, nevndi í 1. sending, at nú Føroyar eru so væl samanbundnar, eigur tungt vinnuvirksemi at verða savnað á fáum støðum, so gangur og dálking órógva borgarar sum minst. 

2. partur av ”Oyggjar undir trýsti” hoyrist her. 1. partur hoyrist her.