Bakkafrost brúkar lasara móti laksalús

Bakkafrost roynir nú nýggja lasaratøkni at basa laksalús. Skipanin skannar laksin og skjýtur lúsina við lasara, meðan fiskurin svimur í aliringinum.

Tøknin hevur verið roynd seinastu tveir mánaðirnar, og ein fyrimunur er, at fiskurin ikki skal handfarast á sama hátt sum við verandi viðgerðum, eitt nú viðgerð í feskvatni.

Bjarni Larsen, alistjóri í Bakkafrosti, sigur, at talan er um eina kostnaðarmikla íløgu, men riggar skipanin eftir ætlan, kann hon gerast ein skilagóð og fyribyrgjandi loysn.

Í fyrstu syftu er tó ikki ætlanin at gevast við verandi viðgerðarhættum. Bakkafrost vil fyrst fáa royndir við nýggju tøknini og vita, hvussu hon riggar í føroyskum umstøðum.

Lasaratøknin verður longu brúkt í Norður-Noregi og í Íslandi. Í Føroyum verður skipanin stýrd úr Kollafirði, og Bakkafrost er í holt við at seta eitt serligt lasaratoymi.

Hoyr innslag her: