Settu tvey landsliðsmet í París

Teir fýra føroysku svimjararnir, sum kappaðust til EM í franska høvuðsstaðnum París, settu tvey føroysk landsliðsmet.

Heini Mohr Askam og Líggjas Joensen úr Ægir og Ísak Brisenfeldt og Silas Dam Lindberg úr Havnar Svimjifelag settu liðmet í 4x100 og 4x200 metur frísvimjing, skrivar svimjing.com.

Tíðirnar vóru ávíkavist 3:29.39 og 7:58.51. EM-kappingin var hørð - trý heimsmet og átta evropeisk met vórðu sett - og mettíðirnar góvu føroyingunum eitt aftasta pláss og eitt næstaftasta pláss. 

Umframt svimjararnar, venjarar og ferðaleiðarar vóru Katja Lervig Vestergaard og Rakul Nolsøe í Lágabø eisini við til EM sum dómarar. Tær hava útbúgving sum altjóða yvirdómarar í svimjing, skrivar Svimjisamband Føroya.