Pantskipanin bíðar eftir lógarbroyting

Nýggja pantskipanin, sum skuldi fara at virka í dag, verður seinkað, tí ein lógarbroyting skal gerast fyrst.

Tað sigur Eyðdis Hartmann Niclasen, landsstýriskvinna, við Kringvarpið.

Løgtingið hevur samtykt eina lóg, sum skal gera tað møguligt hjá fólki at sleppa av við pantíløt á einum stað. Skipanin skal setast í verk við kunngerð. Men hon er ikki lýst enn.

Sleppa undan MVG

Nú er Fíggjarmálaráðið komið til ta niðurstøðu, at MVG-lógin skal broytast fyrst, so eingin ivi er um, at nýggja pantskipanin er undantikin MVG-skyldu.

Eyðdis Hartmann Niclasen væntar ikki, at tað fer at taka drúgva tíð. Men tað er kortini ein ávís tilgongd, sum skal til, fyri at broyta eina lóg.

Málið liggur nú í Fíggjarmálaráðnum.