Føroyar varðveita ratingina hjá Moody's

Ratingfyritøkan Moody's gevur Føroyum somu rating sum áður; Aa2, við støðugum útlitum.

Tað skrivar Landsbankin.

Umboð fyri Moody's vóru í Føroyum í juni og høvdu fund við landsstýrið, andstøðuna og við Landsbankan.

Próvtalsstigin hjá Moody's hevur 21 stig, og Írland hevur somu rating sum Føroyar.

Ratingin er meting, sum sigur, hvussu væl fyri eitt land er ført fyri at afturrinda skuld.

Fíggjarligt sjálvræði

Nakrar grundgevingar verða givnar fyri metingini
 - at Føroyar hava fíggjarligt sjálvræði,
 - at landið hevur stórt gjaldføri (eitt minsta-innlán upp á 4,2 millardir krónur,
 - at Føroyar hava góð rakstrarúrslit fyri løgur,
 - og at skuldin er lutfalsliga lítil.

Moody's nevnir, at fólkatalið veksur, at tørvur er á at gera íløgur, og at arbeitt verður við at gera ein undirsjóvartunnil til Suðuroyar, men hann verður ikki nevndur sum nakað, ið ávirkar kredittmetingina.