Landsstýrið fer at viðgera lógina um meirvirðisgjald

Landsstýrið fer í næstum at viðgera alla lógina um meirvirðisgjald. Og undantøk og frítøkur í lógini eiga at vera endurskoðað. 

Tað sigur Aksel V. Johannesen, landsstýrismaður.

Hann hevur svarað Hervør Pálsdóttur, løgtingskvinnu. Hon spurdi, um atgongumerki til millum annað sjónleikir og konsertir ikki eiga at sleppa undan meirviðisgjaldi.

Landsstýrismaðurin sigur, at undantøk og frítøkur hava við sær meiri og tyngri umsiting hjá vinnurekandi og myndugleikum. 

Tey minka grundarlagið undir meirvirðisgjaldinum. Og óvist er, um undantøkini og frítøkurnar altíð hava ætlaðu ávirkanina.

Meirvirðisgjaldið er størsta og týdningarmesta inntøkukeldan hjá landskassanum, sigur hann.
Landsstýrið hevur ikki viðgjørt spurningin um at sleppa atgongumerkjum til millum annað sjónleik og konsertir undan meirvirðisgjaldi.

Fíggjarmálaráðið veit ikki, hvussu nógv, ein tílík frítøka hevði kostað, sigur Aksel V. Johannesen.