Gráa gullið: Tey eldru hava nógv at geva

Vit liva longur, og alsamt fleiri hava nógv góð og virkin ár eftir, tá arbeiðslívið er av. Men hvussu kunnu vit sum samfelag fáa størri gagn av royndunum og førleikunum hjá teimum eldru?

Hetta tosaðu Hans Jacob Hermansen, fyrrverandi lærari, og Annemi L. Joensen, forkvinna í Eldraráðnum í Tórshavnar kommunu, um í Morgunsendingini.

Tey bæði halda, at tað hevur týdning at taka burtur forðingar, sum gera tað minni lokkandi hjá eldri at halda fram á arbeiðsmarknaðinum. Millum annað varð mótrokning í pensjónini nevnd. Samstundis eiga arbeiðspláss í størri mun at hugsa um, hvussu vitan og royndir hjá eldri kunnu koma yngri starvsfólkum til góðar.

Men eitt gott pensjónslív snýr seg ikki bara um arbeiði. Sjálvboðið arbeiði, felagslív og tað at hava okkurt at fara upp til kann eisini geva innihald og kensluna av framvegis at hava týdning.

Og so er frælsið eisini ein týðandi partur av at gerast pensjónistur: Eftir eitt langt arbeiðslív eigur tú sjálvur tíðina og kanst velja, hvat tú vilt brúka hana til.

Hoyr alla samrøðuna við Hans Jacob Hermansen og Annemi L. Joensen.