Ísborg fer at standa í 75 milliónum

Reiðaríið Ango í Vági hevur keypt skipið Margréth úr Íslandi.

Skipið er 18 ára gamalt og bygt í Norra. Tá ið Ísborg, sum skipið nú skal eita, er umvælt, fer tað at standa reiðaríinum í 75 milliónum krónum. 

Í summar løgdu feløgini Ango og helmingurin av felagnum Kinnfelli, sum átti skipið Katrina Jóhonnu, saman.

Ætlanin var, at Gráastein við skipinum Birita eisini skuldi vera við í samanleggingini, men Gráastein tók seg seinni burturúr, og tí var tað eitt og eitt hálvt reiðarí, sum løgdu saman.

Yvirtekur kvoturnar hjá Ango

Gamla skipið hjá Ango við sama navni varð selt fyrr í summar til Marokko fyri 44 milliónir. Í longri tíð hevur nýggja reiðaríið arbeitt við at keypa annað skip.

Ísborg yvirtekur kvoturnar hjá Ango og helvtina av kvotunum hjá Katrin Jóhonnu.

Í fjør keypti Ango saman við Varðanum Eysturbúgvan, og tá fekk felagið rættindini til silda- og makrelkvoturnar hjá Eysturbúgvanum. Sildin og makrelurin eru fiskað í ár, men góð 7.000 tons av svartkjafti eru eftir at fiska. 

Hoyr innslag í útvarpstíðindunum: