Spæl føroyskt vikan skotin ígongd

Aftur í ár skipa Tónleikasamband Føroya og Kringvarp Føroya í felag fyri eini Spæl føroyskt-viku, sum hesa ferð er frá 5. til 11. oktober.

Hesa vikuna hoyra vit føroyskan tónleik burturav í útvarpinum, og livandi framførslur og framløgur vera kring alt landið.

Í dag var setanin av Spæl føroyskt-vikuni í Salti, har forkvinna í Tónleikasambandi Føroya, Jenny Agustudóttir Kragesteen, setti Spæl føroyskt-vikuna. 

Jenny Kragesteen sentir Spæl føroyskt-vikuna

Á hvørjum horni

Spæl føroyskt er vika, har framførslur eru á hvørjum horni - allastaðni frá ellisheimum til tey stóru mentanarhúsini kring alt landið. Talan er um framførslur av øllum tónleikasløgum - alt frá føroyskum sálmum til modernaðan popp. 

Fleiri dagstovnar og skúlar, spælistøð og kirkjur og kommunur hava tikið undir við vikuni seinastu árini. 

Endamálið er, at vit øll í felag verja okkara tónleikaarv, menna tónleikapallin og kveikja áhuga fyri tónleiki og føroyskum tónleiki.

Tónleikur hevur serligan eginleika at savna fólk og at skapa vælveru, um tað so er at lurta eftir tónleiki, spæla tónleik ella syngja við.