Í lagi at herfólk brúka Merkið

Einki skrivligt samskifti var millum føroyskar og danskar myndugleikar um Merkið á búnunum hjá donskum herfólki.

Men í seinnu hálvu í 2025 fekk Uttanríkis- og Vinnumálaráðið óformliga kunning frá danska verjumálaráðnum og donsku verjuni um, at starvsfólk í donsku verjuni vóru farin at brúka akslamerki við danska, føroyska og grønlendska flagginum.

- Eg havi ongar trupulleikar av, at starvsfólk í donsku verjuni sjálvboðin brúka akslamerki við Merkinum.

Tað sigur Beinir Johannesen, løgmaður, í svari til Bjarna Kárason Petersen, løgtingsmann.

Og tað er fútin, ikki løgmaður, sum skal ansa eftir, at flagglógin verður hildin, sigur løgmaður eisini í svarinum.