80.000 krónur um mánaðin til at gjalda rokningar

Hjálparpakkin, sum væntandi verður lagdur fram í morgin, fer at hjálpa fyritøkum við at gjalda sínar føstu útreiðslur.

Stuðulin úr landskassanum kann vera upp til 80.000 krónur um mánaðin í tríggjar mánaðir. Afturfyri verður loft lagt á stjóralønina, soleiðis at stjórin í fyritøkuni kann ikki tjena meira enn 600.000 krónur í ár. Og harumframt sleppa fyritøkur, sum fáa lut í kreppupakkanum, ikki at gjalda út vinningsbýti í trý ár.

Hjálparpakkin tekur støði í umsetninginum í øðrum ársfjórðingi í ár, sum verður samanborin við umsetningin annan ársfjórðing í fjør. Vísir tað seg, at umsetningurin næstu tríggjar mánaðirnar minkar, sammett við sama tíðarskeið í fjør, so er landskassin til reiðar at lata stuðul til tað. Stuðulin verður 75 prosent av mista umsetninginum, tó í mesta lagi 80.000 krónur um mánaðin í tríggjar mánaðir.

Enn veit landsstýrið ikki, hvat hesin partur av hjálparpakkanum fer at kosta landskassanum. 

Men koma tildømis 1000 fyritøkur inn í kreppupakkan, og fáa hesar fyritøkur í meðal 40.000 kr/mdr í tríggjar mánaðir, so kostar skipanin landskassanum 120 milliónir krónur.