- Tíðindi, mentan og ítróttur
Góða gongdin skal halda fram
Nýggi venjarin hjá føroyska hondbóltslandsliðnum við monnum, Peter Bredsdorff-Larsen, droymir um at spæla seg til eitt endaspæl, men vil ikki taka munnin ov fullan.
- Vit skulu halda fram við at vinna dystir, eisini á útivølli, og hugsa tær, um Føroyar eisini kunnu vinna eina undankapping, sigur Peter Bredsdorff-Larsen.
- Men tað er kanska at spenna bogan ov hart, so læt okkum taka tað í tunnum skivum, leggur hann afturat.
Skuldi taka ein steðg
Peter Bredsdorff-Larsen hevði ongar ætlanir um at gerast føroyskur landsliðsvenjari nú, heldur tvørturímóti. Eftir sjey ár við leiðsluni í Bjerringbro-Silkeborg, har hann leiddi felagið til meistaraheitið í 2016, ætlaði hann at leggja hondbóltin frá sær í eitt ár.
Men so stakk møguleikin seg brádliga upp.
- Eg havi altíð verið upptikin av menning, og eg og mín arbeiðsfelagi, Lars Møller, sum verður hjálparvenjari, gleðast um hvønn dag, har vit fáa møguleikan at menna bæði spælarar og lið, sigur Peter Bredsdorff-Larsen.