- Tíðindi, mentan og ítróttur
VIDEO: Her fer Ever Given loksins úr Suesveitini
Nógv umrødda bingjuskipið Ever Given, sum í mars mánaði forðaði allari skipaferðsluni í Suez-veitini, er loksins farið víðari.
Hetta hendi fyrrapartin, eftir at egyptisku myndugleikarnir og eigararnir og tryggingarfyritøkan hjá Ever Given skrivaðu undir eina endurgjaldsavtalu.
Skipið hevur verið afturhildið í tríggjar mánaðir. Tað er ikki greitt, hvussu stórt endurgjald talan er um, men Egyptaland hevur fyrr kravt 550 milliónir dollarar í endurgjaldi. Tað svarar til góðar 3,5 milliardir krónur.
400 metrar langa bingjuskipið Ever Given sigldi á land í Suez-veitini í nógvum vindi 23. mars í ár, og øll skipaferðslan í veitini steðgaði upp. Síðani tá hevur Kanalmyndugleikin SCA kravt endurgjald frá japansku eigarunum av skipinum fyri bjarging, skaða á veitina og annað.
Ever Given, sum hevur indiska manning, er framvegis lastað við umleið 18.300 bingjum. Tað skal nú kannast av kavarum í Port Said, áðrenn tað setir kós móti Rotterdam og síðani til Felixstowe í Bretlandi, har skipið skal lossast.