Kvinnur á odda í kappingini um at gerast forseti

Líkt er í løtuni til, at ein kvinna verður næsti forseti Íslands.

Veljarakanningar vera gjørdar hvørja viku.

Í kanning, sum var kunngjørd fríggjadagin, eru Katrín Jakobsdóttir, fyrrverandi forsætisráðharri, og Halla Hrund Logadóttir, stjóri í orkustovninum, nú javnar.

Tær hava báðar 25 prosent.

Men Katrín fór úr 23 upp í 25 prosent.

Halla fór 36 niður í 25 prosent.

Baldur Þórhallsson er á triðja plássi. Hann hevði 18 prosent.

Kanningin var gjørd frá 3. til 9. mai.

Helvtin svaraði 

2.525 fólk vóru spurd. Knappliga helvtin svaraði.

Forsetavalið í Ísland verður 1. juni.

12 stilla upp, seks kvinnur og seks menn.

Hetta er níggjunda forsetavalið í Íslandi. Ongantíð eru so nógv uppstillað sum í ár.

Tey vóru níggju í 2016 og seks í 2012.

Seks fólk hava verið forsetar í Íslandi, teirra millum ein kvinna. Vigdís Finnbogadóttir var forseti frá 1980 til 1996.