Borgarstjórarnir í Vágum sinnaðir at tosa um samanlegging

Eyð Ellingsgaard, borgarstjóri í Sørvágs kommunu, tekur undir við Bjarna Prior, borgarstjóra í Vága kommunu, sum heldur, at kommunustýrini, sum verða vald eftir valið, seta seg niður og vita, um undirtøka er fyri eini samanlegging.

Bjarni Prior segði við netavísina VP fríggjadagin, at kommunustýrini, sum verða sett eftir komandi kommunuval í heyst, eiga at seta seg saman og kanna nærri, hvussu undirtøkan er fyri eini kommunusamanlegging í oynni.

"Eg meti, at tíðin er komin til at leggja Vágar í eina kommunu, og júst nær er ikki so týðandi, men meira, at ein tilgongd verður byrjað", segði Bjarni Prior við VP.

Eyð Ellingsgaard sigur, at hóast hetta ikki hevur verið umrøtt yvirhøvur í Sørvágs kommunu hetta seinasta valskeiðið, so er tíðin komin til at hyggja upp á tann møguleikan.

Hoyrið samrøðu við Eyð Ellingsgaard her: