Droymir um útheimin og Olympisku leikirnar

Um vikuskiftið svam Vár Erlingsdóttir Eidesgaard í Tórshavn Open, og vann nógv gullheiðursmerki til Havnar Svimjifelag. Júst sum hon plagar.

Men alt er ikki, sum tað plagar hjá einum av sterkastu føroysku svimjarunum seinastu árini.

Hetta er nevniliga ein nýggj byrjan.

 - Tað er ringt at sleppa svmijingini, og eg tími ikki at leggja hana frá mær, tí eg veit, at eg kann gera tað betri, sigur Vár Eidesgaard.

Sterki frísvimjarin legði fyri kortum svimjihettuna frá sær og gavst. Hon telist millum elstu svimjararnar í føroysku elituni, og tá korona steðgaði mestsum øllum kappingarvirksemi uttanlands, var trupult at halda dampinum uppi.

 - Tað hevur verið strævið. Motivatiónin hevur ikki verið góð, og tað var ein av grundunum til, at eg tók ein steðg, sigur Vár Eidesgaard.

Nú er hon aftur í hylinum, og nýggja byrjanin hevur eisini nýggj mál við sær.

Vár Eidesgaard arbeiðir í løtuni við at finna sær ein skúla í USA, har hon bæði kann svimja og útbúgva seg. Ætlanin er, at fara vesturum hav næsta ár.

Til ta tíð vil hon fegin arbeiða og svimja uttanlands.

 - Eg vil fegin sleppa til eitt stað, har tey hava eitt gott lið, har eg kann trívast, og har tey eru betri og svimja skjótari enn eg, so eg kann læra nógv, sigur Vár Eidesgaard.

Kappingar eru nú aftur uttanlands, og svimjarin úr Havnar Svimjifelag ætlar sær at kappast til NM, EM og kanska HM eisini, men hon droymir enn størri.

 - Eg vil fegin koma upp á toppin; møguliga OL 2024.

mynd_var_2.jpg