Heitt kjak um springaradráp

Áhugin fyri springaradrápinum í Skálafirði er stórur, ikki bara í Føroyum, men eisini uttanlands. Fjølmiðlar og tíðindastovur úr fleiri londum venda í dag eyguni móti teimum 1428 springarunum, sum løgdu beinini í Skálafirði sunnukvøldið. 

Teirra millum eru eisini altjóða miðlar sum BBC, Sky News, Daily Mail, The Times, The Herald og tíðindastovan AFP.

Fólkatingsmaðurin Sjúrður Skaale heldur, at stóra springaradrápið er ein stórsligin gáva til Sea Shepherd, sum eisini kann gerast sera dýr fyri føroyska útflutningin.

Landsstýrismaðurin Jacob Vestergaard sær tó ongan vanda fyri útflutninginum. Hann heldur tvørturímóti, at føroyingar skulu standa saman um sín rætt at drepa springarar, og at drápið sunnukvøldið gekk fyrimyndarligt.

Sjúrður Skaale & Jacob Vestergaard kjakaðust í sjónvarpsstovuni í kvøld.