- Tíðindi, mentan og ítróttur
Avgjaldsfríar kvotur til tey størstu reiðaríini
Føroyska makrelkvotan er søguliga stór í ár. Men lítið bendir á, at føroysku skipini klára at fiska kvotuna. Nú vertíðin fer at halla, er nærum helvtin av samlaðu kvotuni eftir at fiska.
Meðan uppsjóvarskipini rinda tilfeingisgjald av sínum kvotum, so verða partar av kvotunum latnar sum stuðul til skip, ið vanliga ikki fiska makrel.
Og meðan nógv er eftir at fiska av kvotunum við avgjaldi - eru avgjalds-fríu kvoturnar næstan uppfiskaðar.
Ein gjøgnumgongd av teimum 68 loyvunum, latin sum stuðul til partar av flotanum, vísir, at meira enn annarhvør makrelur endar í teimum fýra, stóru samtøkunum í fiskivinnuni.
Talan er um beinleiðis stuðul til sterkastu reiðaríini í fiskivinnuni, sum als ikki hava tørv á stuðli.
Tað metir Hans Ellefsen, búskaparfrøðingur, nú meginparturin av makrelkvotunum til heimaflotan fer til feløg hjá fýra teimum stóru uppsjóvar-samtøkunum. Varðin-samtakið hevði 100 milliónir krónur í yvirskoti í fjør, eftir skatt. Palli hjá Mariannu samtakið hevði 67 milliónir í yvirskoti, eftir skatt. Framherji samtakið hevði 85 milliónir í yvirskoti í fjør, eftir skatt. Og JFK-samtakið hevði 21 milliónir í yvirskoti í fjør, eftir skatt. Tilsamans høvdu hesi fýra samtøk 273 milliónir í yvirskoti í fjør, eftir skatt.