Fingu eina gylta løtu - vildu hava meir

Føroyingar fingu gyltu løtuna í Parkini.

Fyri 31 árum síðan, mátti Peter Schmeichel skava bóltin úr egnum máli, og í gjárkvøldi mátti sonurin, Kasper Schmeichel gera tað sama.

í 1990 var tað Allan Mørkøre, sum skoraði; hesa ferð var tað Klæmint A. Olsen, sum fekk høvdið á, og Schmeichel og hinir misti flotta nullið í málprotokollini. 

 - Hon (løtan, red.) var øgiliga góð. Eg hevði eina støða, sum kanska var betri beint áðrenn, har eg raki málmannin, so eg skyldaði eitt og heldigvís kom tað, segði Klæmint Olsen, sum við sínum níggjunda landsliðsmálið leggur seg undir liðini á Toda Jónsson á málskjúttalistanum. Nú er bert Rógvi Jacobsen frammanfyri við sínum 10.

Bæði liðskiparin, Hallur Hansson, og venjarin, Håkan Ericson, vóru glaðir fyri, at tað eydnaðist at skjóta mál ímóti Danmark, men vóru ikki heilt nøgdir við avrikið kortini.

 - Vit høvdu nakrar góðar royndir at koma í álop í fyrra hálvleiki, men eftir steðgin er tað spæl uppá eitt mál í ein hálvan tíma, segði Håkan Ericson.

 - Eg eri væl nøgdur við arbeiðsinnsatsin, og eg eri væl nøgdur við hvussu vit halda teimum frá málkjansum, men vit vinna ikki nóg nógvar bóltar, og tá vit gera, brúka vit hann ikki nóg væl.