- Vit hava kempað, kempað og kempað, og nú er tað okkara túrur

Steypavinnararnir úr B36 stórfegnaðust eftir steypasigurin í kappingini um Løgmanssteypið, sum Mathias Thrane avgjørdi við síðsta sparkinum í brotssparkskappingini.

 - Vit hava kempað, kempað og kempað, og nú er tað okkara túrur, segði Dan Brimsvík, sum kundi fegnast um ein frálíkan enda á einum kappingarári, sum hevur gingið upp og niður.

 - Hetta var júst tað, sum eg droymdi um; at enda mína fótbóltsleið í Føroyum og B36 við at vinna steypakappingina, segði Sebastian Pingel, sum nú fer niður aftur til Danmarkar at búgva, eftir seks kappingarár í føroyskum fótbólti.

Eins fegnir og B36-spælararnir vóru, eins vónsviknir vóru teir í gulum. 

 - Tá tað endar við brotsspørkum, kann alt henda. Vit høvdu eydnuna við okkum mánakvøldið, men tað høvdu vit ikki í dag, segði NSÍ-liðskiparin.