Føroysk filmsvinna ring kor

Sendirøðin TROM er eitt bragd, framt av Jón Hammer og Torfinni Jákupsson. Tað heldur Pætur Marjunarson Dahl, sum er royndur filmsframleiðari. Men framleiðararnir av TROM hava megnað bragdi hóast ring kor hjá føroyskari filmsvinnu. 

- Hevði fíggjarligur stuðul komið úr Føroyum frá byrjan, kundi ræðisrætturin eisini ligið í Føroyum. Kanska kundi Hannis Martinsson so tosað føroyskt og ikki danskt, sigur Pætur Marjunarson Dahl. 

Hann eftirlýsir, at føroyskir myndugleikar ikki einans skapa góð kor fyri útlendska filmsframleiðslu í Føroyum, men eisini fyri sjálva føroysku vinnuna - tey, sum arbeiða við filmi í Føroyum. 

- Tað letur seg snøgt sagt ikki gera at liva av at gera føroyskar filmar. Í míni 11 ár í filmsvinnuni havi eg verið lágløntur og als ikki løntur summi tíðarskeið, og tað eru í høvuðsheitinum útlendskar verkætlanir, sum hava rindað mær løn fyri ymsar uppgávur, sigur Pætur Marjunarson Dahl. 

Jón Hammer, framleiðari av TROM sigur, at tað er serstakliga stroymingartænastan Viaplay, sum fíggjar TROM. Og Viaplay hevur sostatt eisini í stóran mun avgerðarrættin. 

- Tá vit eru ósamd, fara vit í eitt samskifti, og vit hava tapt nakrar dystir móti Viaplay. Men vit kalla kortini sendirøðina fyri eina føroyska sendirøð, meðan Viaplay marknaðarførir sendirøðina í dag sum eina danska sendirøð, sigur Jón Hammer. Hann vísur á, at fyri TROM hevur tað sum so ikki stóran týdning, um sendirøðin er ein føroysk ella donsk sendirøð. Hann hevði ynskt sær, at Hannis Martinsson tosaði føroyskt, men vísur á, at tá Viaplay vísti áhuga fyri sendirøðini var tað eisini eitt krav, at høvuðsleiklutin skuldi ein kendur, altjóða sjónleikari hava. 

- Vit umrøddu í byrjanini, um vit ynsktu at gera verkætlanina við einum donskum Hannis, men tað bleiv skjótt til ein spurning um vit í heila tikið vildu framleiða TROM. Og tá valdu vit sjálvandi at gera sendirøðina við teimum treytum, sum vit høvdu, sigur Jón Hammer.