Vildu helst spælt á heimavølli

Um ein mánaða skal hondbóltslandsliðið við kvinnum spæla tveir play-off dystir ímóti Kosovo.

Báðir HM-undandystirnir eru á útivølli.

 - Vit vilja altíð spæla heima, og tað er nógv best at spæla í Føroyum, sigur Ninna Katrin Johansen, sum er ein av teimum, sum eru við í bruttohópinum, sum er farin undir fyrireikingarnar til dystirnar.
 
 - Tað er sjálvandi nógv verri, bæði mentalt, at flúgva og tílíkt, men vit mugu taka tað og royna at gera okkara besta, sigur Súna Krossteig Hansen.

Ætla sær víðari kortini

Hóast báðir dystirnir vera á útivølli, eru vónirnar góðar hjá bæði spælarum og venjaranum, Sonni Larsen.

 - Um vit spæla upp til okkara besta, hava vit kjans. Tað, vit hava sæð, hevur Kosovo spælt fínt, men vit hava avgjørt møguleikan, sigur venjarin.

Áðrenn dystirnar ímóti Kosovo, skal landsliðið spæla tveir venjingardystir ímóti Íslandi. Hesir vera báðir í Føroyum.