Mitt í fótbóltsdreyminum

 - Eg kundi ikki biðið um meir.

Tað staðfestir 18 ára gamli Martin Agnarsson, og tað er ikki so løgið.

Tí fótbóltstilveran hjá kvika bakkinum flytir seg við nógvari ferð frameftir í løtuni. Í summar skifti hann B36 út við Viborg, og nú er hann við í A-landsliðshópinum hjá Håkani Ericson fyri fyrstu ferð.

 - Tað er hent sera nógv upp á øgiliga stutta tíð, sigur Martin Agnarsson, og hann ger ikki ov nógv av.

Viborg er eitt felag í stórari menning, og í løtuni liggja teir grøna á 2. plássi í donsku superliguni. Martin Agnarsson fekk skjótt pláss í dystarhópinum, og nýliga fekk hann eisini fyrstu minuttirnar í landskappingardysti.

 - Tað er ein uppliving at vera við til dystirnar og síggja øll hesi fólkini, sum koma at hyggja og vita, at 'tú kanst í roynd og veru spæla her', greiðir Martin Agnarsson frá.

Hann ætlar sær at arbeiða hart fyri at fáa meir tíð á vøllinum hetta kappingarárið, men fyrst eru venjingardystirnir ímóti Kekkia og Kosovo á skránni, og har er málið tað sama.

 - Eg vóni at sleppa at spæla eitt sindur. Tað er ein dreymur at sleppa at spæla á landsliðnum, so um tað hevði hent, er tað enn ein dreymur, sum verður veruleiki, sigur Martin Agnarsson.

Kringvarpið tosaði við Martin Agnarsson í gjár. Sí samrøðuna omanfyri