Kundi verið betri, men sanniliga eisini nógv verri

 - Tað kundi verið betri, men sanniliga eisini nógv verri.

Tað segði nýggi hjálparvenjarin hjá føroyska manslandsliðnum í hondbólti, Julian Johansen, eftir EM-lutakastið, sum sendi Føroyar til Berlin at spæla ímóti Norra, Slovenia og Póllandi í januar.

Norra var í ovasta styrkisbólki, og tað verður sjálvandi ein stór avbjóðing hjá Føroyum at spæla ímóti stjørnubakkinum, Sander Sagosen, og hinum norsku stjørnunum.

Slovenia og Pólland eru eisini góð lið, men Julian Johansen heldur kortini, at tey eru til at tosa við.

 - Eg vil siga, at tey eru rættiliga jøvn, og tað, sum sermerkir tey bæði, er, at tey eru í nøkulunda sama styrkislagi sum Eysturríki, beint oman fyri Kekkia og Rumenia, segði Julian Johansen.

- So hetta eru lond, sum vit so líðandi kunnu spæla upp ímóti, men tað merkir, at vit skulu hava ein dag, har alt riggar, meðan tey ikki skulu hava sín besta dag.