Føroyar - Albania: Dirvi og betri avgerðir

Tá albanar vitja á Tórsvølli í kvøld, er neyðugt hjá føroysku spælarunum at vísa størri dirvi, enn teir gjørdu í 3-0 tapinum fyri Kekkia leygarkvøldið.

 - Mann skal tora betur at hava bóltin, men vit mugu eisini taka rættar avgerðir, tá vit koma fram á vøllin, sigur miðvallarin, Jákup Biskopstø Andreasen.

 - Har eru støður ímóti Kekkia, har vit hava kjans at revsa teir, men har vit taka ta skeivu avgerðina.

Hetta er fyrsta ferðin, at føroyska manslandsliðið spælir ímóti Albania, sum er eitt gott lið, men sum kanska hóskar betur til føroyska spælistílin, heldur landsliðsvenjarin, Håkan Ericson.

 - Teir eru ikki eins sterkir kroppsliga, teir hava renniorku, men ikki somu styrki. Hinvegin eru teir kanska uppaftur betri tekniskt og spæla skjótt á smáum økjum, sigur landsliðsvenjarin.

Fari verður eftir sigrinum í kvøld, hóast fleiri skøvur komu í landsliðslakkið leygarkvøldið.

 - Vit fara altíð inn fyri at vinna, og tað er serliga á heimavølli. Tað er altíð útgangsstøði, og tað trúgva vit altíð upp á, sigur Jákup Biskopstø Andreasen.

Dysturin ímóti Albania byrjar klokkan 19.45, og Kringvarpið stroymir undansending frá klokkan 19:00 her.