Eiri vann gull og varð skaddur

Alt gekk eftir ætlan hjá Eira Jógvansson Glerfoss.

Hann hevði lopið 7.12 í fyrstu royndini, og hóast hann ikki var komin longur út, hevði hann trý lop eftir til at røkka út ímóti 7.40 metrum, sum var málið.

Tá hann við fullari ferð setti kós ímóti sandinum fjórðu ferð, steðgaði hann brádliga, og tá hann tók um baklærið, sá ikki gott út.

Hann skræddi nummarið av sær mestsum beinavegin, tí hann visti, at tað ikki loysti seg at royna umaftur.

Hetta var eitt lítið vónbrot, men sigurin fekk hann kortini, og tað var plástur á sárið. Tað, sum verri er, er at sprintarin kanska ikki kann taka lut í føroysku mansstafettini fríggjadagin.

Tað kemur illa við, tí við honum og Jónasi G. Isaksen á liðnum, høvdu Føroyar havt góðan gullmøguleika.

Hvørki Eiri J. Glerfoss ella venjararnir vildu avskriva møguleikan, tí tað var ikki greitt beinanvegin, hvussu ringur skaðin er.