Liðskiparin ætlar sær víðari

Sum ikki einaferð gekk Jákup Biskopstø Andreasen fremstur í frálíka avrikinum hjá KÍ ímóti Lille á Tórsvølli í kvøld.

Aðrir á liðnum, til dømis Patrick da Silva og Odmar Færø, vóru kanska sjónligari, men liðskiparin er sjálv ímyndin av støðuga KÍ-liðnum, sum aftur í kvøld legði ein kapittul afturat spennandi framhaldssøguni, sum er skrivað í summar.

Jákup Biskopstø Andreasen fegnaðist sanniliga um avrikið og stigið, men legði áherðslu á, at arbeiðið var ikki meir enn byrjað og at KÍ ætlar sær víðari. 

 - Vit vænta okkum enn ein harðan dyst (ímóti Olympija Ljubljana). Tað er meistarin úr Slovenia, so stigið er høgt, segði KÍ-liðskiparin.

 - Tað verður aftur ein dystur, har vit fyrst og fremst skulu lata okkum í arbeiðshandskarnar, og renna teir metrarnar, sum skulu til. Men tað er á heimavølli, og vit ætla okkum víðari, so har skulu vit eisini fáa stig, segði Jákup Biskopstø Andreasen.

Torir tú at skjóta upp á, hvussu nógv stig koma afturat?

 - Nokk til at koma víðari!