Hoyvíkskvinnur royna seg í fremstu røð

Næsta ár spæla kvinnurnar hjá FC Hoyvík í bestu deildini.

Í nógv ár hava tær gjørt vart við seg í ungdómsfótbólti, har tær hava vunnið meistaraheiti og steypakappingar, og í fjør spældu tær í 1. deild.

Nú er tíðin komin at royna seg millum tey bestu, siga kvinnurnar og formaðurin, Fróði Danielsen.

 - Eg haldi, at tað er ordiliga spennandi. Hetta verður ein stór avbjóðing, men vit eru til reiðar, sigur Hellen Simonsen.

 - Tað var ein løtt avgerð at taka og ein neyðug avgerð at taka, sigur Fróði Danielsen. 


Tilfeingið er gott

Felagið ásannar, at tilboðið hevur ikki nøktandi, tá evnaríku spælararnir røkka vaksnamannaaldur.

 - Tí hava vit verið noydd at taka hetta stigið. Vit royndu fyrst við 1. deild, og nú fara vit upp í Betri-deildina. Tað eru spælararnir, sum bera hetta fram. Teir vilja fegnir hetta, sigur Fróði Danielsen.

 - Vit hava nóg nógvar spælarar í Hoyvík, men allar eru vælkomnar at royna seg, sigur Hellen Simonsen.

Ein týðandi táttur manglar í enn, um royndin hjá hoyvíkingum í bestu deildini skal eydnast. Kvinnurnar hava ongan venjara fingið enn.

 - Tann ábyrgdin liggur hjá nevndini nú, sigur Fróði Danielsen.