SEINAST: Teitur bjargaði brotssparki og Odmar skoraði

Kanska frægasti dysturin hjá Føroyum í ár var ímóti Albania á Tórsvølli í juni.

Gamaní, byrjanin var einki serlig. Fyrst legði Nedim Bajrami útiliðið framum, og tá ein hálvur tími var spældur, gjørdi Heini Vatnsdal brotsspark.

Teitur Matras Gestsson kastaði seg til høgru og bjargaði skotinum frá Sokol Çikalleshi, og beint fyri steðgin javnaði Odmar Færø við góðum skallara eftir fríspark frá Jóan Símuni Edmundsson.

Albania skoraði til 2-1 stutt eftir steðgin við fantastiskum langskoti frá Kristjan Asllani, men miðskeiðis í seinna hálvleiki løgdu Føroyar trýst á.

Andras Johansen átti at havt rakt málið við góðum skallara við handaru stong, meðan ein albanskur verjuspælari fekk fótin á eitt gott skot frá Jóannesi Bjartalíð, sum hevði kós ímóti handara horninum. 

Tað gekk kortini, sum tað ofta ger, tá tú ikki skorar upp á kjansirnar. Albania, sum eisini hevði fleiri stórar málmøguleikar, avgjørdi dystin í evstu løtu eftir kontraálop.

Tórsvøllur (EM-undankapping)
Føroyar - Albania, 1-3 (1-1)

0-1 Nedim Bajrami, 20 min.
1-1 Odmar Færø, 45 min.
1-2 Kristjan Asllani, 51 min.
1-3 Ernest Muçi, 90 min.