Innsatsur og vilji manglaðu ikki

Besti spælarin hjá KÍ ímóti Slovan Bratislava var helst Vegard Forren.

Tað var ein fragd at síggja 35 ára gamla miðverjan senda bæði langar og stuttar bóltar fram eftir vøllinum. Mestsum uttan undantak raktu teir liðfelagar í góðum støðum, sum síðan kundu halda fram við álopinum.

Norðmaðurin var eisini størsta einstaka orsøkin til, at tapið ikki gjørdist størri enn 2-1. Serliga løtuna beint fyri steðgin kom hann fleiri ferðir fyri í evstu løtu, tá ið slovakar høvdu fingið ov gott pláss í KÍ-brotsteiginum.

 - Tú stendur altíð við eini tómari kenslu, tá ið tað ikki eydnast at fáa stig, men tú verður hart revsaður ímóti góðum liðum í Evropa, og soleiðis var hjá okkum í dag. Men innsatsur og vilji manglaðu ikki, segði Vegard Forren eftir dystin.


Gera piltamistøk

KÍ byrjaði dystin væl og spældi seg til fleiri góðar støður og onkran góðan málkjans.Tað eydnaðist eisini Mads Boe Mikkelsen at leggja KÍ framum eftir frálíka langa sending frá júst Vegardi Forren.

Men sambært norska verjuspælaranum fingu slovakar ov lætt spæl, bæði tá ið teir javnaðu, og tá ið teir løgdu seg framum í seinna hálvleiki.

 - Vit eru ov vánaligir, tá ið teir skora síni mál. Tað eru grundleggjandi mistøk, piltafeilir, segði Vegard Forren, nú bert útidysturin ímóti Lille er eftir av søguliga kappingarárinum hjá KÍ, sum síðan kann hyggja frameftir.