- Verjan stendur betur í dag

Fríggjakvøldið skeyt hann átta mál upp á ein hálvleik, leygarkvøldið skoraði hann bara eina ferð.

Rói Berg Hansen ásannaði, at seinni dysturin ímóti Belgia var harðari og intensari, men helt, at føroyska verjan stóð seg betur enn í fyrra dystinum.

 - Eg haldi, at vit standa betur í verjuni í dag. Vit eru meira fysiskir og klárari, enn vit vóru í gjár, segði vinstri vongurin.

Fyrri hálvleikur var javnur, Føroyar vóru frammanfyri næstan alla tíðina, men beint fyri steðgin yvirhálaði Belgia. Eftir steðgin sást munurin so líðandi, og heimaliðið avgjørdi seinastu løtuna. 

Nú handlar tað um EM, segði Rói Berg Hansen.

 - Nú eru vit so nær við, sum vit kunnu vera, og vit gleða okkum bara. Hetta hevur verið øgiliga fín fyrireiking, og vit hava havt nakrar góðar vikur saman, so vit eru spentir, segði Rói  Berg Hansen.

Nakrar fáar venjingar eru á skránni afturat, áðrenn føroyingarnir leggja leiðina til Týsklands týsmorgunin.