Avatar Andrias lesur veðrið á fronskum, sponskum, kinesiskum og ukrainskum

Regin W. Dalsgaard, ið er ein av eigarunum av kanningarstovuni Thetis, hevur stóran áhuga í øllum, ið hevur við tøkni at gera. 

Í sambandi við kjakið um vitlíki í skúlunum, og at Kringvarp Føroyar hevur strikað ensku útgávuna av tíðindunum, hava Regin W. Dalsgaard og Andrias Gregoriussen, veðurmaður á Veðurstovu Føroya, gjørt eina roynd at automatisera sjónvarpaðu veðurtíðindini við at brúka vitlíki, ella AI. 

Teir báðir hava gjørt ein avatar, ið er ein eftirgjørdur skapningur, av Andriasi við at brúka vitlíki. 

Brádliga sær tað út til, at Andrias Gregoriussen dugir at lesa veðurtíðindini á bæði týskum, fronskum, sponskum, kinesiskum og ukrainskum. 

Regin W. Dalsgaard vísir á, at tað er serliga hugtakandi at geva gætur, at andlitsbrá og kropsmál broytast alt eftir, hvat mál, ið Avatar Andrias tosar. 

Úrslitið er nærmast ræðandi sannførandi.