Bíligari breyð og mjólk: Landsstýrið leitar eftir fígging

- Eg vóni og vænti, at tað verður í 2025.

Tað sigur Aksel V. Johannesen, løgmaður, til spurningin, nær føroyingar kunnu rokna við at fáa bíligari mjólk og breyð.

Fleiri landsstýrisfólk hava sagt, at meirvirðisgjaldið á gerandisvørur so sum mjólk og breyð skal minkast ella strikast, og tað verður eisini nevnt í samgonguskjalinum. Men í nýggjasta fíggjarlógaruppskotinum, sum er lagt fyri tingið, sæst einki til hesar ætlanirnar.

Landsstýrið leitar eftir fígging til hetta, tí tað skal ikki kosta landskassanum nakað, og tí mugu minkaðu mvg-inntøkurnar finnast aftur onkra aðrastaðni, sigur Aksel V. Johannesen, løgmaður, sum væntar, at eitt uppskot verður klárt at leggja fyri Løgtingið um nakrar vikur.