Óli fekk fólkið á føtur

Tað var serliga ein spælari, sum fekk fólkið á føtur í Høllini á Hálsi.

Eftir ein eitt sindur stirvnan álopsinnsats í fyrra hálvleiki, setti Óli Mittún veruliga ferð í eftir steðgin, og tá høvdu tungu verjuspælararnir hjá Kosovo ongan kjans at fylgja við.

 - Vit koma eitt sindur illa frá byrjan, og vit sita eitt sindur fastir í álopinum, men tá vit byrja at spæla sjey ímóti seks og fáa screeningarnar við, hava teir tað rættuliga trupult, segði Óli Mittún eftir dystin.

Tað sást tíðliga, at føroyingarnir høvdu betri einstaklingar enn gestirnir, men teir fingu ikki veruliga glið á spælið í fyrra hálvleiki, har liðini fylgdust leingi. Løtuna fyri steðgin glapp tó eitt sindur, og góða gongdin gjørdist uppaftur betri í seinna hálvleiki, tá Føroyar og serliga Óli Mittún struku avstað.

IK Sävehof-bakkurin, sum í summar skiftir til GOG, vísti seg fram frá síni bestu síðu við gjøgnumbrotum og knøppum skotum úti frá, sum vórðu umsett til átta mál og fimm upplegg.

 - Tað var rættiliga strævið í dag. Teir góðu mær rættiliga nógv hørð skump í dag, men tað var hart og stuttligt.