Ónøgd á Hvítanesi: Víst til Háls at velja

Nýggja valstaðið í Hoyvík, Hoyvíkshøllin, hevur fingið góða móttøku frá fólki í nærumhvørvinum, sum sleppa at velja har fyri fyrstu ferð.

Men fleiri eru, sum høvdu kunnað hugsað sær at valt í Hoyvík. Helgi Joensen av Hvítanesi er ein av teimum, men hann og hini í bygdini verða víst til Háls í Havn, og tað er hann ikki nøgdur við.

 - Nei, so avgjørt ikki. Tað er ein langur umvegur at koma oman á Háls, og har verða við beind til Reyðu høll at parkera, og so skulu vit ganga niðan á Nabb, sigur hann.

Hann heldur, at tey 40-50 fólkini, sum hava valrætt á Hvítanesi, áttu at sloppið at valt í Hoyvík.