Oyggjaleikir settir: Oddvør og Róland á odda undir sólini

Róland Toftum bar Merkið og Oddvør Alberta Kimsdóttir føroyska vatnið, tá Anna prinsessa av Stórabretlandi setti oyggjaleikirnar á Orknoyggjum seinnapartin leygardagin.

Sólin skein av heiðum himni, tá tey á leið 2000 ítróttafólkini úr tilsamans 24 oyggjasamfeløgunum marsjeraðu av Bignold Park og oman ígjøgnum Kirkwall.

 - Tað er ein stórur heiður, tað vil eg siga, segði ein errin Róland Toftum, sum hesa ferð er við sum venjari hjá teimum mongu svimjarunum.

 - Tað var ordiliga stuttligt. Fólk heppaði uppá okkum og tóku myndir, segði 13 ára gamli fimleikarin, Oddvør Alberta Kimsdóttir, sum er við á leikunum fyri fyrstu ferð.

Nógv fólk vóru komin at heilsa upp á tey mongu ítróttafólkini - góð 70 av teimum føroyskir íðkarar - og tey stóðu framvið vegnum í dýrdarveðrinum, sum hevur verið á Orknoyggjum síðstu dagarnar.

Í morgin byrja kappingarnar. Føroyar kappast um heiðursmerki í triathlon og í 10.000 metra renning.