Rørdur Rúni Øster skrivaði søgu

Kenslurnur sótu uttaná, tá Rúni Øster tryggjaði sær sigurin í einmansleiki við monnum á síðsta kappingardegnum á oyggjaleikunum.

Hann var ikki við á Guernsey, tá badmintonliðið stóð seg sera væl, og hann hevur verið illa darvaður av skaða, men nú var hann klárur og gjørdi bart ímóti Toke Driefter úr Grønlandi.

Havnarmaðurin vann 2-1 (22-20, 19-21, 21-16) í einum jøvnum dysti, og tá hann avgjørdi síðsta bóltin kláraði hann ikki at halda tárunum aftur og mátti fjala andlitið.

 - Hatta var heilt fantastiskt. Tað vóru gleðistár har til endans. Eg havi verið ígjøgnum so nógv, og tað er heilt fantastiskt at koma her og vinna gull fyri Føroyar, segði Rúni Øster.

 - Eg visti, at mótstøðumaðurin var góður, og tað fór at blíva ein ordiliga harður dystur, og tað vórðu eisini trý ordiliga hørð sett. Eg kláraði næstan at vinna í øðrum setti, men eg fór ikki niður við høvdinum. Eg hugsaði; "nú taki eg bara triðja sett", og tað gjørdi eg kraftedeme eisini, segði søguliga gullvinnarin.

Við sigrinum gjørdist hann fyrsti føroyski maðurin, sum hevur vunnið kappingina í einmansleiki á oyggjaleikum.