Søguliga gullið kemur ikki av ongum

Føroyar hava í dag vunnið gull í liðkappingini í hálvmaraton, og samstundis vann Julian Gregersen bronsu. Hetta er fyrstu ferð síðani 1989, at Føroyar fáa gull á langteini og fyrstu ferð at Føroyar vinna gull í liðkappingini.

Fyrstur um málstrikuna var Julian Gregersen. Hann hevur í ár sett fleiri nýggj met og er væl fyri. So væl fyri, at hann kláraði at renna 5000 metrar renningina í gjárkvøldið, og blíva nummar trý í hálvmaraton í morgun.

 - Eg havi lagt nógvar kilometrar í hetta, so eg eri væl fyri. Eg føldi eisini, at tað gekk væl í undanbrekkunum. Tá slepti eg bara hondbremsuni, sigur Julian Gregersen.

Rógvi Kárason kom á mál sum nummar fimm. Tað var nokk til at tryggja gullið, men Neli Heldarskarð gjørdi snilt í at koma á mál beint uttanfyri topp tíggju. Hann bleiv nummar 12. Hevði staðið á jøvnum millum Føroyar og Gozo, sum bjóðaði av, so hevði plaseringin hjá Nela verið avgerandi.

Julian Gregersen, Rógvi Kárason og Neli Heldarskarð vóru allir væl nøgdir við síni avrik í morgun. Kendi føroyski rennarin, Hallur Holm, var til staðar við vatnborðið og sigur við Kringvarpið, at hetta er fyrstu ferð síðani 1989, at Føroyar vinna eina gull á langteini á oyggjaleikunum.

Í stafettunum vunnu Føroyar silvur í 4x400 metrar hjá monnum og bronsu í 4x400 metrar hjá kvinnum. Í báðum førum vóru rennararnir fegnir um at fáa sítt heiðursmerki.